ينفع أغير كارت الشاشة في اللابتوب؟

ينفع أغير كارت الشاشة في اللابتوب؟

What User Can Change in Laptop : بنتلخبط كتير بين الكمبيوتر العادي واللابتوب، وبنفتكر إن كل حاجة نقدر نغيرها فيه زيه زي الكمبيوتر، لكن بعد وقت تكتشف حاجات ماينفعش نغيرها أو مابنعرفش ازاي نغيرها، هو إيه اللي ممكن يتغير في مكونات اللابتوب؟

بروسيسور: البروسيسور في نسبة كبيرة من الأجهزة بيكون سهل يتغير ببروسيسور تاني من نفس الجيل، إلا لو كان من الأنواع المدمجة باللوحة الأم في الجهاز، زي بروسيسورات Atom من إنتل 

رامات: تقدر تزودها بسهولة بحد أقصى قطعتين، وفيه مساحات مختلفة من أول قطعة 2 جيجا لحد قطعة واحدة 16 جيجا, حاليا فيه أجهزة بيكون فيها رامات مدمجة اللوحة الأم الخاصه بالجهاز، وده بيوفّر مكانين فاضيين تقدر تركب فيهم رامات لغاية 32 جيجا.

هارد: تقدر تزوّد مساحة الهارد الداخلية، بس فيه لابتوبات لازم قياس الهارد يكون 7 ملي بدل 9 ملي علشان بتكون لابتوبات رُفيعة, وفيه لابتوبات تانيه بتعتمد علي SSD، وهي وحدات تخزين عبارة عن شرايح زي الميموري، ودي مناسبة للابتوبات الرفيعة جدا جدا, أو تقدر تعتمد على الهاردات المتنقلة لو مش عايز تفك الجهاز وتلغوص فيه. 

اللوحة الأم: زي ما احنا عارفين ماحدش بيعرف يغير أمه ففعلا مابتعرفش تغير اللوحة الأم في اللابتوب، علشان هي مصممة خصيصا للجهاز ده، لكن ممكن لو باظت تدوّر على أم تانية غيرها تكون نفس نوع القديمة

بطارية: البطارية ممكن استبدالها ببطارية زيها أو أعلى منها، حسب نوع الجهاز وكونه بيقبل باعلي او لا.

شاشة: يمكن تغييرها بأي نوع تاني، لكن لازم تكون نفس الأبعاد، وإن الموصل الخاص بالشاشة الجديدة اللي هتركبها يقبل على اللوحة الأم الخاصة بالجهاز، أو لو عايز تشتغل على شاشة أكبر من شاشة اللابتوب الأصلية، تقدر توصل الجهاز على شاشة أكبر عن طريق كبل HDMI او Display Port او لو انت غلبان اوي مشيها VGA

كارت الشاشة: في الغالب بيكون مُدمج بالبروسيسور أو مدمج باللوحة الأم وساعتها ماينفعش تغيره، لكن في حالتين بس ممكن تغير كارت الشاشة فيهم: 

الحالة الأول إن اللابتوب يكون بيدعم خاصية MXM، وهي إن الكارت بيبقى عبارة عن شريحة ممكن تغييرها، واللابتوبات اللي فيها الخاصية دي بتكون مكلفة.

الحل التاني هو جهاز خارجي بيكون فيه مزود طاقة  خاص تقدر تركب فيه كارت شاشة زي ما أنت عايز، هو مُكلف برضه، بس حل أفضل من MXM، لأنك تقدر تركب كارت شاشة أعلى من أقوى كارت موجود للابتوبات، بس لازم يكون اللابتوب فيه مدخل Thunderbolt، وده مدخل تقدر ترسل وتستقبل منه إشارة فيديو وصوت وداتا في نفس الوقت
دي كل الحجات الي تقدر تغيرها في اللابتوب ولانهي مستوي تقدر تغيرها المهم بعد كده متقولش انك عايز تجدد كرت لابتوب ليضحكوا عليك !

حول الكاتب

رامي مصطفي

الألعاب ... عشقي الأول وعشقي الثاني هو كسر السرعة, محب ل PlayStation بجميع اصداراته , من العابي مفضله Resident Evil - Metal Gear - Dino Crisis - Devil May Cry , يهمني في مقام الأولي المحتوي المعروض وطريقه اللعب بالاضافه للقصة.