في حيرة بدون داعي ممكن أي حد يقع فيها لما يفكّر يشتري كمبيوتر جديد، أو حتى يطوّر القديم علشان يلبي احتياجاته، كل اللي عليك تحدد أنت عاوز تشتري ليه، وفي خطوات ممكن تساعدك علشان تقدر تحدد.

2- حدد ميزانية ماتخرجش عنها

أيوة طبعا مش منطقي تدفع 20 ألف جنيه لمجرد تصفح الإنترنت، ولا منطقي تشتغل جرافيكس بجهاز ب 5 آلاف جنيه، في رأينا اختيارك لاحتياجك هو العامل الموثر في تحديد الميزانية. ممكن نحدد أكتر: – تصفح انترنت ( 1500-4000 ) – ألعاب كره قدم او ألعاب خفيفة ( 3000-6000 ) – ألعاب بجرافيكس قوية ( 8000- 15000) – شغل جرافيكس أو مونتاج ( 12000-25000) ملحوظة: الأرقام السابقة من آخر بحث على سعر المواصفات الموصي بها في السوق المصرية

1- رتب أولويات احتياجاتك

– محتاجه لتصفح الإنترنت وشغل مكتبي عادي زي Word و Excel أو قرايه إميلات – محتاجه لألعاب كرة قدم أو ألعاب خفيفة للأطفال – محتاجه للألعاب برضه بس ألعاب بجرافيكس قوية – محتاجه لشغل مكتب هندسي وجرافيكس (عادية – متوسطة) – محتاجه لشغل جرافيكس كبير أو مونتاج للفديوهات حددت أنت أنهي مستوي فيهم وأولوياتك إيه؟

3- حدد أنت عايز إيه في الجهاز نفسه

بعد ما حددت أولوياتك وميزانيتك فيه حاجات في الجهاز بتكون أهم ليك من غيرها، يعني فيه حاجات سهل تغييرها بعدين وحاجات ينصح من الأول إنك تجيبها على حسب احتياجك بالظبط

مساحة التخزين

الهاردات في منها مساحات كتير، بس مش لازم تجيب مساحة كبيرة من الأول، لأن ممكن تزود عدد لا نهائي من الهاردات سواء خارجية أو داخلية وزي ما بيقولوا “البحر يحب الزيادة”

الكيسة

ترجع لتفضيلك الشخصي، أهم حاجة تدور عليها هي التهوية الجيدة للمكونات، أي حاجة تانية زي الشكل والحجم بترجع لتفضيلك الشخصي “وصوابعك مش زي بعضها”

البروسيسور

العقل المدبّر للجهاز كله، كل ما كان العقل قادر يعمل عمليات أكتر كل ما كان أفضل للفئة اللي أنت اختارتها، يعني عقل يقدر يعمل عملية أو اتنين كافي لتصفح الانترنت، لكن عقل يقدر يعمل 20 عملية ده مناسب لشغل جرافيكس ومونتاج

كارت الشاشة

بينقسم لحاجتين، الحاجة الأولانية هي إنه فيه كروت موجودة في بروسيسورات –كارت داخلي جوّا البروسيسور- ولو أنت استخدام إنترنت وأفلام وألعاب خفيفة مبننصحش تشتري كارت خارجي، اللي بيحتاجه بس هما بتوع الجرافيكس والمونتاج.

كلامنا الي فات ده يمشي مع اختيارك للابتوبات برضوا ، لكن خلي بالك ان لابتوبات مش بنفس قوة الكمبيوتر العادي!

الرامات

رامات برضه زيها زي الهاردات ممكن تزودها بعدين، كبداية أقل شئ ممكن 4 جيجا بايت لمتصفحي الإنترنت والألعاب الخفيفة، أو 8 جيجا بايت لألعاب قوية.

اللوحة الأم

واضحة “الأم”، هي أم كل حاجة في الجهاز، يعني وأنت بتشتري بتشوف تقدر تركب كام هارد فيها, كام مخرج USB فيها, اشتري لوحات لشركات معروفة أفضل، كمان اتأكد بتشيل كام رامة وبروسسورات من أنهي فئة

مزود الطاقة

المفاعل النووي اللي هيشغل الكلام ده كله ويمده بالكهربا, مهم جدا تختار السعة اللي أنت هتحتاجها ودي ترجع لاستخدمك اللي أنت حددت نفسك فيه من الأول، يعني إنترنت محتاج 300 واط، ألعاب خفيفة 450، ألعاب تقيلة لحد 850 واط، وشغل جرافيكس محتاج 1000 واط أو أكتر.
حول الكاتب
رامي مصطفي

رامي مصطفي

الألعاب ... عشقي الأول وعشقي الثاني هو كسر السرعة, محب ل PlayStation بجميع اصداراته , من العابي مفضله Resident Evil - Metal Gear - Dino Crisis - Devil May Cry , يهمني في مقام الأولي المحتوي المعروض وطريقه اللعب بالاضافه للقصة.