في أبلكيشنز كتير جدا تقدر تنزلها، بس إيه المهم منهم وتقدر فعلا تعتمد عليه؟ دي المشكلة، في 5 أبلكيشنز تحديدا نحب نقولك متستغناش عنهم.

برنامج Shazam
بنسمع كتير موسيقى أو أغاني في أي مكان وبيكون نفسنا نعرف اسم الأغنية أو التراك ده، البرنامج ده تسمعه أي حاجة تعجبك، يجيبلك قرارها ويحتفظلك بيها على بروفايل خاص بيك، علشان ترجع تسمعهم تاني في أي وقت

اول ما تفتح البرنامج هتلاقي واجهة بسيطه تقدر منها تشغل البرنامج علشان يتحققلك من الموسيقى أو الأغنية اللي شغالة دلوقتي، أو لو أنت في مكان بيشغل أغاني بشكل سريع أو لو بتتفرج على فيلم وعايز تحتفظ بالأغاني اللي فيه كلها، اضغط على أوبشن “Auto” وهو هيتعامل.

برنامج Share it
لو كنت من ملاك الأيفون أكيد عارفه، ولو مش عارفه يبقى فايتك كتير؛ الأبلكيشن ده تقدر تنقل بيه كم هائل من الملفات عن طريق الواي فاي بسرعة كبيرة، كمان تقدر تنقل بيه بين تليفون أندرويد وأيفون.

الابلكيشن فيه اختيارين هو إرسال واستقبال، ولازم تكون علي شبكة واي فاي أو الجهاز يعمل شبكة افتراضية عن طريق Hotspot مثلا، بس خلي بالك يُفضل تقفل الداتا بتاعت الموبيل علشان في حالات كتير بيعتبر الاستقبال والإرسال زي التحميل والرفع!

برنامج Team Viewer
بتحتاج تشوف ملفات على الكمبيوتر الشخصي بتاعك من خلال الموبايل؟ ميزته إنه سهل ومجاني وتقدر تدخل منه على الجهاز بتاعك وتتحكم فيه بسهولة من أي مكان.

تقدر تتحكم من الأبلكيشن بسهولة بعد ما بدّخل iD وباسورد خاصين بجهازك، وبعدها هتكون كأنّك على جهاز الكمبيوتر بتاعك

برنامج True Caller
احنا في 20166 وفي ناس كتير مبتستخدمش الأبلكيشن ده، ببساطة بيخليك تقدر تعرف رقم المتصل بيك ومعلومات عنه -لو هو مسجلها أو حد تاني مسجلها عنه من الكونتاكس بتاعته- يعني ماعندكش حجة، لو حد مش طايقه وماسح رقمه ومش عايز ترد عليه.

إضافة كمان إن البرنامج بيوفّر قائمة تعمل فيها بلوك للناس اللي مش مرغوب فيهم.

برنامج TuneIn Radio
مين فينا مابيحبش يسمع أي دوشه حواليه وخلاص! لو حد موبايله مش بيدعم راديو، الأبلكيشن ده هيوفّرلك محطات من جميع أنحاء العالم بصوت نقي جدا وبيعتمد على إنترنت الموبايل أو الواي فاي علشان يشتغل، تقدر كمان تسجل منه لأي إذاعة أنت بتسمعها.

الواجهه بتاعته سهلة جدا، تعرف إيه التريند النهاردة، يعني المحطة اللي ناس كتير مشغلينها, الموسيقى متقسمة لحاجات كتير زي أغاني ستينات وروك وكلاسيك وكل اللي نفسك فيه، إذاعات رياضية لماتشات كورة وغيرها, أخبار في مختلف المجالات, فيه قصص وروايات تقدر تسمعها. من الآخر برنامج عظيم لدوشة مسلية ومفيدة.